Башҡорт авторҙарының пьесалары буйынса спектаклдәр «Коляда-plays» фестивалендә күрһәтеләсәк

ӨФӨ, 2017 йыл, 20 апрель. /«Башинформ» мәғлүмәт агентлығы, Ләйлә Аралбаева/. «Коляда-plays» халыҡ-ара заманса драматургия фестивалендә башҡорт авторҙарының пьесалары буйынса спектаклдәр ҡуйыласаҡ. Улар — Гомерҙың «Илиада» әҫәре буйынса «Троя хаҡында йыр. Бында һәм хәҙер» (Әнгизә Ишбулдина, Марат Мөхлисов, Зөһрә Бураҡаева, Анна Ерошина) һәм Айгиз Баймөхәмәтовтың «Ҡалдырма, әсәй!» повесы буйынса Әнгизә Ишбулдинаның «Хыялға ҡаршы». «Хыялға ҡаршы» спектакле — 26 июндә, «Троя хаҡында йыр. Бында һәм хәҙер» 27-дә «Щелкунчик» балет театрында сәхнәләштерелә.

Йыл һайын июнь айында ҡаланың театр майҙандарында «Коляда-plays» халыҡ-ара заманса драматургия фестивале уҙғарыла. Фестивалде үткәреү һәм уны тергеҙеү идеяһын 2008 йылда Рәсәйҙең атҡаҙанған сәнғәт эшмәкәре Николай Коляда тәҡдим иткән. Был башланғысты Рәсәй Сәнғәт эшмәкәрҙәре союзының Свердловскиҙағы төбәк бүлексәһе әүҙем күтәреп алған.

Төп программала - спектаклдәр ҡарау һәм уларҙы фестиваль дирекцияһы махсус ойошторған Театр тәнҡитселәре коллегияһының халыҡ алдында тикшереүе. Фестивалдә һуңғы өс театр миҙгелендә заманса драматургтарҙың пьесалары буйынса ҡуйылған спектаклдәр ҡатнаша.