Өфөлә биш кеше «Танцы» шоуына һайлап алыу турын үтте

ӨФӨ, 2017 йыл, 11 апрель. /«Башинформ» мәғлүмәт агентлығы, Әлфиә Әғлиуллина/. Өфөлә ТНТ каналында барған «Танцы» шоуының дүртенсе миҙгеле кастингы тамамланды. Уның һөҙөмтәләре буйынса жюри телевидениела һайлап алыу турында ҡатнашыу өсөн биш бейеүсене һайлап алды. Тағы ла һигеҙ кеше резерв исемлеккә индерелде һәм саҡырғандарын көтөп ҡала, тип хәбәр итте «Башинформ» агентлығына Башҡортостандың баш ҡалаһындағы проект координаторы.

Кастингтың тәүге этабын үткән ҡатнашыусылар Мәскәүҙә йәнә үҙ көсөн һынаясаҡ. Республикабыҙ вәкилдәренең бейеү шоуына үтеүе-үтмәүе йәй аҙағында ғына билдәле буласаҡ.

Һайлап алыу турында Өфөнән һәм яҡындағы ҡала-райондарҙан 130-ҙан ашыу бейеүсе ҡатнашты. Бәйгеселәрҙең сығышын проекттың ижади продюсеры Армен Оганян һәм хореограф Алексей Карпенко баһаланы.