Рус драма театры «Дюймовочка» яңы музыкаль проекты өсөн кастингка саҡыра

ӨФӨ, 2017 йыл, 15 март. /«Башинформ» мәғлүмәт агентлығы, Ләйлә Аралбаева/. Өфөлә Рус драма театры яңы проект өсөн йырсылар һәм бейеүселәргә кастинг иғлан итте. 19 һәм 20 апрелдә 18 йәштән алып 35 йәшкәсә башҡарыусылар көндөҙгө сәғәт 12-нән киске 9-ға тиклем театрға килә ала. Адресы: Октябрь проспекты, 79.

Йырсылар вокаль һәм артислыҡ һәләтен тулыраҡ асҡан номерҙар әҙерләргә тейеш. Фонограмма, аккомпаниатор ярҙамында, шулай уҡ a cappella йырларға мөмкин. Бейеүселәргә заманса стилдәге хореографик номер әҙерләргә кәрәк. Конкурс номерҙарын күрһәтеү өсөн фонограммаларҙы компакт-дискта йәки флешкала үҙең менән алып килеү мотлаҡ.

Рус драма театры яңы проект — Ким Брейтбург һәм Карен Кавалеряндың балалар һәм өлкәндәр өсөн «Дюймовочка» әкиәте өҫтөндә эш башлай. Был ижади тандем театр сәхнәһендә ҙур уңыш менән барған «Зәңгәр камея» мюзиклы буйынса тамашасыларға яҡшы таныш. Кастингка продюсер һәм композитор Ким Брейтбург, Гнесиндар исемендәге Рәсәй музыка академияһының өлкән уҡытыусыһы Валерия Брейтбург килә. Театрҙың әҙәби бүлеге мөдире Елена Попова әйтеүенсә, спектаклдә күмәк халыҡ ҡатнашлығында күренештәр күп. Премьера киләһе миҙгелгә билдәләнгән.

Белешмәләр өсөн телефондар: 233-24-63; 8-917-342-81-91, 8-905-351-12-70.