Өфөлә ХIII Әхмәров тыуған яҡты өйрәнеү уҡыуҙары өс иҫтәлекле датаға бағышлана

ӨФӨ, 2017 йыл, 13 март. /«Башинформ» мәғлүмәт агентлығы, Ләйлә Аралбаева/. 25 мартта Өфөлә, Башҡортостандың Милли музейында, ХIII Әхмәров тыуған яҡты өйрәнеү уҡыуҙары уҙғарыла. Улар Өфө тыуған яҡты өйрәнеүселәр йәмғиәтенә нигеҙ һалған Флүрә Әхмәрова, Борис Николаевский һәм Владимир Бурцев иҫтәлегенә арнала. Программала Флүрә Әхмәтованың «Хәтер биттәре» тигән яңы китабының исем туйы һәм тыуған яҡты өйрәнеүселәрҙең сығыштары ҡаралған.

Рәсәй мәҙәниәт фондының Башҡортостандағы филиалы директоры Гөлнара Иҡсанова хәбәр итеүенсә, 2017 йыл Өфө һәм Башҡортостандағы тыуған яҡты өйрәнеүселәр өсөн өс юбилей датаһы билдәһе аҫтында уҙа. Улар — Бәләбәй ҡалаһында тыуып үҫкән билдәле ғалим Б.И. Николаевскийҙың 130 йыллығы; бала сағы Бөрөлә үткән тарихсы һәм публицист В.Л. Бурцевтың 155 йыллығы; Флүрә Әхмәрова исемендәге Өфө тыуған яҡты өйрәнеүселәр йәмғиәтенең 20 йыллығы.

Апрелдә күренекле яҡташтарыбыҙҙың иҫтәлегенә бағышланған «Хәтерҙең алтын биттәре» төбәк тыуған яҡты өйрәнеү конкурсы башлана.