Төбәктә «Тәбиғәт. Кеше. Мәҙәниәт» халыҡ-ара акцияһы йомғаҡтары буйынса фотокүргәҙмә асылды

ӨФӨ, 2017 йыл, 27 февраль. /«Башинформ» мәғлүмәт агентлығы, Ләйлә Аралбаева/. Ҡариҙел районында XXVII «Тәбиғәт. Кеше. Мәҙәниәт» халыҡ-ара акцияһы йомғаҡтары буйынса «Ҡариҙел ере — дуҫтар күҙлегенән» тигән фотокүргәҙмә асылды. Италия, Иран, Ҡаҙағстан, Ҡырым Республикаһы, Мәскәү, Башҡортостан фоторәссамдары төшөргән пейзаждар, матур, изге күңелле һәм эшһөйәр кешеләр, ҡәҙерләп һаҡланған йолалар һәм мәҙәниәт киң мәғлүмәт сараларында һәм социаль селтәрҙәрҙә, күргәҙмәләрҙә һәм альбомдарҙа бөтә донъяға таралды. Фотоһүрәттәрҙә тәбиғәттең матурлығын: урман-тауҙарҙы, күлдәрҙе һәм Павловка һыуһаҡлағысын, Ҡариҙел ҡыҙҙары һәм егеттәренең сибәрлеген һәм ҡыйыулығын сағылдырған «Йәшлек» бейеү ансамблен, сит кешеләрҙе туғандары кеүек ҡаршы алған ҡунаҡсыл халыҡты күрергә мөмкин. Күргәҙмә ҡыҙыҡһыныу һәм тыуған төйәк, яҡташтар өсөн ғорурлыҡ тойғоһо тыуҙырҙы.

Күргәҙмәне асыуҙа Ҡариҙел районы башлығы Илдар Ғарифуллин һәм ошо районда тыуып үҫкән Рәсәй Геройы, летчик Владимир Алимов ҡатнашты.

«Ҡариҙел ере дуҫтарҙың күҙҙәре менән» күргәҙмәһе — «Башҡортостан. Тәбиғәт. Кеше. Мәҙәниәт-2017» акцияһының халыҡ-ара фоторәссамдар турында ҡатнашыусыларҙың бер көнлөк кенә тәьҫораттары, тип билдәләне райондың мәҙәниәт идаралығы етәксеһе Руслан Булатов, күргәҙмәне асып. «Бөгөн Ҡариҙел районы үҙенең 85 йыллығын билдәләй, һәм ошо күргәҙмә — фоторәссамдарҙың ҡариҙелдәргә һәм байрам ҡунаҡтарына бүләге. Районыбыҙҙың фоторәссамдар менән дуҫлығы дауам итер, тип ышанабыҙ, һеҙ беҙҙә һәр саҡ ҡәҙерле ҡунаҡ», — тине район хакимиәте башлығы Илдар Ғарифуллин, күргәҙмәне ойоштороусыларға — «Башҡортостан. Тәбиғәт. Кеше. Мәҙәниәт» акцияһының координаторы, Башҡортостандың халыҡ рәссамы Рәмил Килмәмәтовҡа һәм «Ағиҙел» республика фотоклубы хеҙмәткәре Рәмил Нафиҡовҡа рәхмәт хаттарын тапшырып.

Фотокүргәҙмәне ойоштороусылар — Башҡортостан Мәҙәниәт министрлығы, Ҡариҙел районы хакимиәте, Республика халыҡ ижады үҙәге, Рәсәй Фоторәссамдар союзының Башҡортостандағы бүлексәһе һәм «Ағиҙел» республика фотоклубы.