Йәштәр театры Ватанды һаҡлаусылар көнөнә махсус программа әҙерләгән

ӨФӨ, 2016 йыл, 22 февраль. /«Башинформ» мәғлүмәт агентлығы, Ләйлә Аралбаева/. Ватанды Һаҡлаусылар көнөнә арнап 22 һәм 23 февралдә Мостай Кәрим исемендәге Башҡортостан Республикаһы Милли Йәштәр театрында башҡорт һәм урыҫ труппалары «Заһир, Гөлшат һәм Берлиндан асҡыстар» спектаклен ҡуя. Режиссер Мөсәлим Күлбаевтың постановкаһы Мостай Кәримдең төрлө йылдарҙа яҙған әҫәрҙәре: проза, публицистика, хәтирәләре нигеҙендә эшләнгән.

«Байрам алды көнө, 22 февраль, тиккә һайланмаған. Артистар спектаклде көндөҙгө сәғәт 3-тә ҡуя, уны мәктәп уҡыусылары һәм студенттар ҡарай ала», — тип аңлатты театрҙың матбуғат секретары Дарья Ольхова.

23 февралдә киске сәғәт 8-ҙә Камера сәхнәһендә традицион «Квартирник» уҙа. Был Йәштәр театрының «Шансон» радиостанцияһы менән уртаҡ проекты. Кисәнең темаһы – «Һалдаттың ялы...». Проектта ҡатнашыусылар әрме тормошона сумасаҡ: улар музыканттар һәм алып барыусылар менән бергә һәммәһенә таныш йырҙарҙы гитараға башҡарасаҡ.