Өфөлә Башҡорт асыҡ КВН лигаһы юбилей миҙгеленең ярымфинал уйыны уҙа

ӨФӨ, 2017 йыл, 22 февраль. /«Башинформ» мәғлүмәт агентлығы, Ләйлә Аралбаева/. 27 февралдә Өфөләге Конгресс-холда Башҡорт асыҡ КВН лигаһы юбилей миҙгеленең ярымфинал уйыны уҙа. «Башҡорт юморы һағында» тип аталған уйында «Бер минут» (Өфө), «Мыртый» (Ейәнсура районы), «Нөктә.ru» (Өфө), «Башstar» (Салауат районы), «Ритайым+» (Күгәрсен районы), «Әннәгиҙергеннәйем» (Санкт-Петербург) командалары ҡатнаша. Уйын йомғаҡтары буйынса бишенсе миҙгел финалсылары билдәләнә.

Ҡатнашыусылар «Ике көн ҡунаҡ, өсөнсө көн — муйнаҡ», «КиВиНда ла булдыҡ беҙ», «Күңелең киң булһа, шаяртыу табыла», бер йыр конкурсы, «Йырым булһын бүләгем» бәйгеләрендә көс һынаша.

«Биш йыл эсендә Башҡорт асыҡ КВН лигаһы уйынына һигеҙ меңгә яҡын кеше килгән. Лига республика уҡыусылары араһында уйындар, лидер йүнәлешендәге тренингтар, КВН мәктәптәрен ойоштора. Республиканан ғына түгел, башҡорттар күпләп йәшәгән ҡалаларҙан: Мәскәүҙән, Силәбенән, Санкт-Петербургтан командаларҙың ҡатнашыуы йолаға әүерелгән. Ҡаҙағстандың «Жайдарман» лигаһы һәм Татар КВН лигаһы менән бәйләнештәр яйға һалынған. Берлектәге саралар үткәреү күҙаллана», — тип хәбәр итте «Башҡорт асыҡ КВН лигаһы» рәйесе Урал Кәримов.

Сараны ойоштороусы — Башҡортостандың «Башҡорт асыҡ Шаяндар һәм отҡорҙар клубы лигаһы» төбәк йәмәғәт ойошмаһы.