Өфөлә «Алтын битлек» лауреаттары өлкәндәр өсөн ҡурсаҡ спектаклен сәхнәләштерә

ӨФӨ, 2017 йыл, 22 февраль. /«Башинформ» мәғлүмәт агентлығы, Ләйлә Аралбаева/. Өфөлә «Алтын битлек» лауреаттары өлкәндәр өсөн «Мең дә бер кисә» спектаклен сәхнәләштерә. Башҡорт дәүләт ҡурсаҡ театрында ғәҙәти булмаған тамаша өҫтөндә эш башланды. «Театр сәхнәһендә өлкәндәр өсөн бындай спектаклдең премьераһы 20 йыл эсендә тәүгә ҡуйыла», — тип билдәләне баш режиссер ярҙамсыһы Диана Гәрәева.

Ошо спектакль өҫтөндә эшләү өсөн ҡурсаҡ театры директоры Альберт Имаметдинов талантлы ижади төркөмдө: режиссер, «Алтын битлек» премияһы лауреаты Петр Васильевты (Петрозаводск) һәм рәссам, «Алтын битлек» премияһы лауреаты Алевтина Торикты (Санкт-Петербург) саҡырған.

«Был ваҡиға минең тормошомда бик мөһим, сөнки мин үҙем Өфөнән, әммә күп йылдар инде Санкт-Петербургта йәшәйем һәм эшләйем, — тине Алевтина Торик. — Башҡорт ҡурсаҡ театры менән мине иң йылы мөнәсәбәттәр бәйләй: бында минең әсәйем эшләне, бала сағымда ағымдағы репертуарҙың бөтә спектаклдәрен ҡарап сыҡтым. Өфө сәнғәт училищеһын тамамлағандан һуң ошо уҡ театрҙа «Татлы бәлеш» спектакле минең тәүге етди эшем булды. Йылдар үткәс йәнә ошонда ҡайтыуыма һәм Петр Васильевич менән өлкәндәр өсөн әкиәт ҡуйыуыма бик шатмын».

Премьера 11 мартта уҙа, билеттарҙы театр кассаһында әле үк һатып алырға мөмкин.