Башҡортостандың һәләтле балалары Рәсәйҙең 16-сы йәштәр Дельфий уйындарында сығыш яһаясаҡ

ӨФӨ, 2017 йыл, 17 февраль. /«Башинформ» мәғлүмәт агентлығы, Ләйлә Аралбаева/. Башҡортостандың һәләтле балалары Рәсәйҙең 16-сы йәштәр Дельфий уйындарында сығыш яһаясаҡ. Төбәк өсөн квотала 20 кеше тәшкил итә. Һайлап алыуҙа Урта махсус музыка мәктәбе, Р. Нуриев исемендәге Башҡорт хореография колледжы, Өфө сәнғәт училищеһы, Сибай сәнғәт колледжы, Ғ. Әлмөхәмәтов исемендәге Республика гимназияһы, Өфө ҡалаһынан Н. Сабитов исемендәге 1-се балалар музыка мәктәбе, шулай уҡ Октябрьский, Стәрлетамаҡ ҡалалары, Белорет, Бәләбәй һәм Стәрлетамаҡ райондарының сәнғәт мәктәптәре уҡыусылары ҡатнашты. Уҡыусыларҙың видеояҙмаларын махсус комиссия ҡараны.

Рәсәйҙең 16-сы йәштәр Дельфий уйындары 18-23 апрелдә Екатеринбургта уҙа. Уйындар Федерация Советының Социаль сәйәсәт буйынса комитеты, Дәүләт Думаһының Физик культура, спорт һәм йәштәр сәйәсәте буйынса комитеты, Рәсәй Дәүләт Халыҡ ижады йорто булышлығында Халыҡ-ара Дельфий комитеты ҡарауы аҫтында һәм Рәсәй Федерацияһының ЮНЕСКО эштәре буйынса комиссияһы эгидаһы аҫтында уҙғарыла.

Дельфий уйындары йолаһы Боронғо Грецияла уҡ барлыҡҡа килгән. Тәүге заманса халыҡ-ара турнир 2000 йылда уҙҙы. Шунан алып йәштәр араһында сәнғәт буйынса бөтә Рәсәй олимпиадаһы донъя ижади беренселеге өсөн һайлап алыу сараһы булып тора.