Башҡортостан һәм Өфө яңылыҡтары
89.82
+0.12
99.72
+0.52
71.06
-1.63
10+ °C
Болотло
Баш
Рус
Eng
Бөтә яңылыҡтар
Мәҙәниәт
13 Февраль 2017, 12:52
Ғәзиз Әлмөхәмәтов музейы интерактив күргәҙмә булдырыуға Башҡортостан Башлығы грантын алды
ӨФӨ, 2017 йыл, 13 февраль. /«Башинформ» мәғлүмәт агентлығы, Ләйлә Аралбаева/. Башҡортостанда Ғәзиз Әлмөхәмәтов музейы этнографик интерактив күргәҙмә булдырыу өсөн республика Башлығы грантын алды. Гранттың күләме 270 мең һум тәшкил итә. Ғәзиз Әлмөхәмәтов музейы күренекле башҡорт композиторының тыуған ауылында — Көйөргәҙе районының Мораптал ауылында урынлашҡан.
Музейҙа дөйөм майҙаны 109 квадрат метрлыҡ өс зал бар. Экспозицияның беренсе бүлеге – Ғәзиз Әлмөхәмәтов залы, икенсеһе – Хәрби һәм Хеҙмәт Даны залы, өсөнсөһө – этнография залы. Музей директоры Әлфирә Ниғмәтуллина хәбәр итеүенсә, этнография залына тирмә һатып алынасаҡ. Уның эсе боронғоса биҙәләсәк. Ғәзиз Әлмөхәмәтов залы өсөн проектор, экран һәм ултырғыстар һатып алыу ҡаралған. Был музейға килеүселәргә композитор тураһында фильмдар күрһәтергә мөмкинлек бирәсәк. Проект менән таныштырыу сараһы көҙгә билдәләнгән.
Мораптал ауылындағы музей тәүҙә Киров исемендәге колхоздың Хәрби һәм Хеҙмәт Даны музейы тип аталған. Ул 1988 йылда дарыухананың иҫке бинаһында асылған. Мораптал ауыл советының башҡарма комитеты рәйесе, Бөйөк Ватан һуғышында ҡатнашыусы Разик Әбделмәнов музейҙың беренсе директоры була. Уның тырышлығы менән байтаҡ тарихи материалдар һәм экспонаттар тупланған. Киров исемендәге колхоз һәм колхоз рәйесе Р.Ф. Абдуллин ҙур өлөш индерә, халыҡтан экспонаттар йыйыла. Тарихи белешмәләр алыу өсөн Өфө һәм Ырымбур дәүләт архивтарына мөрәжәғәт иткәндәр. 1995 йылдың 27 октябрендә йырсы, композитор, башҡорт һәм татар профессиональ музыкаһына нигеҙ һалыусы, БАССР-ҙың беренсе халыҡ артисы Ғәзиз Сәлих улы Әлмөхәмәтовтың тыуыуына 100 йыл тулыу айҡанлы музей уның исемен йөрөтә башлай.
Әлеге көндә музейҙа төп фондтың – 1160-тан ашыу һәм фәнни-ярҙамсы фондтың 670 берәмек экспонаты иҫәпләнә. Йыл һайын бында Башҡортостандан һәм Ырымбур өлкәһенән 1500-ҙән ашыу кеше килә.
Теги:
башҡортостан башлығы гранттары
музейҙар
Читайте нас: