Шнитке исемендәге Мәскәү музыка институты һәм Өфө сәнғәт институты хеҙмәттәшлек тураһында килешеү төҙөнө

ӨФӨ, 2017 йыл, 9 февраль. /«Башинформ» мәғлүмәт агентлығы, Ләйлә Аралбаева/. Бөгөн А.Шнитке исемендәге Мәскәү дәүләт музыка институты һәм З.Исмәғилев исемендәге Өфө дәүләт сәнғәт институты мәҙәниәт, сәнғәт, фән һәм мәғариф өлкәһендә хеҙмәттәшлек тураһында килешеүгә ҡул ҡуйҙы. Өфөгә Мәскәү юғары уҡыу йорто делегацияһы: Мәскәү дәүләт музыка институты ректоры Анна Щербакова, беренсе проректор Альбина Бикбулатова, профессор Рөстәм Шәйхетдинов һәм доцент Ольга Филатова килде. Өфө дәүләт сәнғәт институты ректоры, профессор Әминә Әсфәндиәрова Өфө вузының эше һәм уның ижади коллективтары менән таныштырҙы.

«Заманса мәғлүмәт киңлегендә Өфө сәнғәт институты кеүек абруйлы уҡыу йорто менән хеҙмәттәшлек итеү беҙҙең өсөн мөһим. Ижади берекмәне киң таратыуға, ғилми-тикшеренеү өлкәһендә бәйләнештәр булдырыуға өмөт итәбеҙ. Студенттар, профессор-уҡытыусылар составы менән алмашыу, оҫталыҡ дәрестәре, берлектәге фестивалдәр, төрлө ижади проекттар ҡаралған», — тип һөйләне А. Шнитке исемендәге Мәскәү дәүләт музыка институты ректоры Анна Щербакова.

«Ошондай килешеүгә ҡул ҡуйыу беҙҙең өсөн ҙур әһәмиәткә эйә. А.Шнитке исемендәге уҡыу йорто 100 йылдан ашыу эшләй. Беҙ күптән бәйләнеш булдырғанбыҙ, шуға күрә бөгөн, бер яҡтан, эшмәкәрлегебеҙгә йомғаҡ яһайбыҙ һәм шул уҡ ваҡытта артабанғы емешле хеҙмәттәшлеккә ҙур өмөт бағлайбыҙ», — тип билдәләне З.Исмәғилев исемендәге Өфө дәүләт сәнғәт институты ректоры Әминә Әсфәндиәрова.

Кисен Шаляпин залында килешеүгә ҡул ҡуйыу сиктәрендә тәүге берлектәге проект тәҡдим ителә. Вуздың тарихи сәхнәһендә халыҡ-ара конкурстар лауреаттары Ольга Филатова һәм Башҡортостандың атҡаҙанған сәнғәт эшмәкәре, профессор Рөстәм Шәйхетдинов сығыш яһай. Музыканттар башҡарыуында И.С. Бах, К.М. Вебер, И. Стравинскийҙың музыкаһы яңғырай. Шнитке исемендәге Мәскәү дәүләт музыка институты ректоры, профессор, академик Анна Щербакова инеш һүҙ әйтәсәк.

«Делегация составында минең менән бергә фортепиано сәнғәте кафедраһы буйынса коллегам, Шуберт исемендәге конкурстың беренсе премия һәм башҡа ижади бәйгеләр лауреаты Ольга Филатованың килеүенә бик шатмын. Бынан алдағы көндә Мәскәү консерваторияһының Ҙур залында уның концерты булды. Бөгөн беҙ яңғыҙ һәм ике рояль өсөн әҫәрҙәрҙе үҙ эсенә алған программа тәҡдим итәбеҙ, — ти Рөстәм Шәйхетдинов. — Бөгөн беренсе тапҡыр бергә уйнайбыҙ, ә 1 мартҡа Мәскәүҙә симфоник оркестр менән сығыш яһау программаһын әҙерләйбеҙ».

Бөгөн Мәскәү дәүләт музыка институты доценты Ольга Филатова Урта махсус музыка колледжы уҡыусылары өсөн оҫталыҡ дәрестәре үткәрә.