Асҡар Абдразаҡов башҡорт халыҡ йырҙарын башҡарырға һәм яҙҙырырға хыяллана

ӨФӨ, 2017 йыл, 7 февраль. /«Башинформ» мәғлүмәт агентлығы, Ләйлә Аралбаева/. Танылған опера йырсыһы, Мария театры солисы, Башҡортостандың халыҡ артисы Асҡар Абдразаҡов киләсәктә башҡорт халыҡ йырҙарын башҡарырға һәм яҙҙырырға хыяллана. Был хаҡта ул «Известия» гәзитенә биргән интервьюһында хәбәр итте.

«Минән күп тапҡыр уларҙы башҡарыуҙы һәм яҙҙырыуҙы һоранылар, әммә бының өсөн ваҡыт кәрәк. Халыҡ йырҙарының мелодикаһы менән үҫеү мөһим. Башҡорт йырҙарындағы үҙенсәлектәрҙе тотоп алыр өсөн ентекле хеҙмәт, тимәк, йәнә ваҡыт талап ителә. Ләкин ҡасан да булһа уларҙы башҡарырмын һәм яҙҙырырмын», — тип билдәләне Асҡар Абдразаҡов.

Йырсы үҙенең тамырҙары, ғаиләһе — атаһы, билдәле башҡорт режиссеры Әмир Абдразаҡов, бер туғаны Илдар, уҡытыусыһы — Өфө дәүләт сәнғәт институты профессоры Миләүшә Мортазина хаҡында ла һөйләне. Ул йәш коллегаларына төрлө яҡлап үҫешергә кәңәш итә.

«Туҡтап ҡалырға ярамай — ижад кешеһе һәр ваҡыт хәрәкәттә булырға тейеш. Халыҡ-ара конкурстарҙа ҡатнашыу мөмкинлегенән файҙаланырға, күренергә кәрәк. Бер ҡасан да үҙеңдең һөнәрең менән генә сикләнеп ҡалырға ярамай. Төрлө яҡлап үҫешергә: китаптар уҡыу, музейҙарға, лекцияларға йөрөү зарур. Матур йырлау өсөн уйға һалырға кәрәк, ә ул һауанан алынмай. Бөтә ошо тәьҫораттар һине камиллаштыра, тамашасылар бындай үҙгәрештәрҙе шунда уҡ һиҙә. Кеше сәхнәгә сығып йырлай башлай — уны тыңлауы ҡыҙыҡ йәки ҡыҙыҡ түгел. Тауышҡа бик күп нәмә бәйле», — тип иҫәпләй Асҡар Абдразаҡов.