Луганск шағиры 112-се Башҡорт кавалерия дивизияһы атлылары хаҡында поэма яҙған һәм уны башҡортсаға тәржемә итеүҙәрен һорай

ӨФӨ, 2017 йыл, 6 февраль. /«Башинформ» мәғлүмәт агентлығы, Гөлфиә Акулова/. Луганскиҙа йәшәгән шағир Андрей Медведенко «Нескончаемый рейд» тигән поэма яҙған, унда 112-се Башҡорт кавалерия дивизияһының яу юлындағы иң киҫкен мәлдәренең береһен — Ворошиловградты (хәҙер Луганск) немец илбаҫарҙарынан азат итеүҙе сағылдырған. 1943 йылдың февралендә составында Миңлеғәле Шайморатов етәкселегендәге башҡорт атлылары булған кавалерия корпусы Донбаста Дебальцево тимер юл станцияһын баҫып алыу өсөн дошман тылы буйлап рейдҡа сыға. Хәрби бурысты ҙур юғалтыуҙар менән үтәйҙәр.

Автор әҫәрҙе Башҡортостандың Хәрби хәрәкәт ветерандары союзы рәйесе Тимерйән Рәжәповҡа тапшырған һәм поэманы республикала баҫтырып сығарыуҙарын һәм уны башҡорт теленә тәржемә итеүҙәрен һораған, тип хәбәр итә «Башҡортостан ветераны» баҫмаһы. Әҫәрҙе сайтта уҡырға мөмкин.

Андрей Медведенко — Украинаның атҡаҙанған мәҙәниәт хеҙмәткәре, билдәле йәмәғәт эшмәкәре, 40-тан ашыу шиғри һәм проза китаптары, «Сказ о Булавинском бунте», «Начдив летучий» тарихи поэмалары, Донбасты тергеҙеү тураһында «Притяжение любви» романы һәм башҡа әҫәрҙәр авторы.