Билдәле башҡорт йырсыһы әҙәби журнал лауреаты булды

ӨФӨ, 2017 йыл, 6 февраль. /«Башинформ» мәғлүмәт агентлығы, Ләйлә Аралбаева/. Республиканың «Бельские просторы» журналы 2016 йылға әҙәби премиялар лауреаттарын иғлан итте. Уҙған көндәрҙә М. Аҡмулла исемендәге Башҡорт дәүләт педагогия университетының Художество-графика факультеның күп функциялы үҙәгендә бүләкләү тантанаһы үтте.

«Проза» номинацияһында билдәле йырсы, Башҡортостандың халыҡ артисы Вәхит Хызыров «Ауылда шулай» хикәйәләр циклы өсөн еңеүсе тип билдәләнде. «Шиғриәт» номинацияһында Ольга Полянина «Үлемһеҙ хаталыҡ» шиғырҙар шәлкеме өсөн еңеү яуланы. «Берҙәмлек» номинацияһында Салауат Әбүзәров «Мәмерйә» хикәйәһе (Г. Байғотлина тәржемәһе) өсөн бүләкләнде. «Тәржемә» номинацияһында Гөлфирә Ғасҡарова Лариса Абдуллинаның «Балҡантау рухы» һәм Лира Яҡшыбаеваның «Зиләйлүк» повестарын тәржемә итеү өсөн билдәләнде.

Бөтә әҫәрҙәр ҙә 2016 йылда журнал биттәрендә донъя күрҙе. Лауреаттарҙың тулы исемлеге баҫманың рәсми сайтында урынлаштырылған.