Башҡорт дәүләт филармонияһында киләһе концерт миҙгеленә абонементтар һатыла башланы

ӨФӨ, 2017 йыл, 3 февраль. /«Башинформ» мәғлүмәт агентлығы, Ләйлә Аралбаева/. Башҡорт дәүләт филармонияһында киләһе 79-сы миҙгелгә – 2017-2018 йылдарға абонементтар һатыла башланы. Республиканың төп концерт ойошмаһы Рәсәйҙең 42 филармонияһы иҫәбендә тәүгә Берҙәм филармония абонементтары һатыу көнөнә ҡушылған. Алдан мәғлүмәт менән танышып, баш ҡалабыҙҙың иң әүҙем меломандары абонементтар һатып алырға килгән. Бер көн эсендә 300-ҙән ашыу абонемент һатылған.

«Абонементтар — 25 процентҡаса ташлама ғына түгел, ә туғандарға һәм яҡындарға теләһә ниндәй байрамға үҙенсәлекле бүләк тә. Тәҡдим ителгән 12 абонементтан һәм кем үҙенә тап килгәнен табасаҡ. Орган, фортепиано, камера музыкаһы, джаз булһынмы ул. Әлегә «Филармония миксы» исемле абонемент алдынғы килә. Тыңлаусы үҙ аллы үҙенең концерттар циклын төҙөй ала», — тип хәбәр иттеләр филармонияның матбуғат хеҙмәтендә.

1 февралдән ағымдағы һәм киләһе миҙгел дауамында абонементтар көн һайын һатыла. Уларҙы һатыу йәрминкәһе 13 февралдә киске сәғәт 4-тән башлана. Шулай уҡ яңы акция иғлан ителгән: касса залында лототрон урынлаштырылған, 78 һәм 79 һанлы (ағымдағы һәм киләһе концерт миҙгеленең тәртип һандары) ҡағыҙ биттәрен сығарыусылар «Иң яҡшы көн» филармония проектының эксклюзив концерттарының береһенә бушлай билет аласаҡ.