«Башҡортостандың 100 исеме» телемарафоны сиктәрендә интернет аша тауыш биреү тамамланды

ӨФӨ, 2017 йыл, 2 февраль. /«Башинформ» мәғлүмәт агентлығы, Ләйлә Аралбаева/. «Башҡортостандың 100 исеме» күләмле телемарафоны барышында интернет аша тауыш биреү тамамланды. Башҡортостан юлдаш телевидениеһы проекты ҙур ҡыҙыҡһыныу тыуҙырҙы, тамашасылар төбәк үҫешенә, уларҙың фекеренсә, тос өлөш индергән кешеләрҙең исемдәрен сайтҡа ебәрҙе. Тәҡдимдәр араһында билдәле мәҙәниәт эшмәкәрҙәренең, йәмәғәтселәрҙең, сәйәсмәндәрҙең исемдәре бар.

Махсус комиссия 200 дәғүәсене һайлап алған. Исемлек tv-rb.ru сайтында бирелгән. Уны йома көндө матбуғат конференцияһында иғлан итәләр. Башҡортостан юлдаш телевидениеһында республиканың йөҙ атаҡлы эшмәкәре хаҡында документаль фильмдар һәм тапшырыуҙар әҙерләнәсәге билдәле.

«Конкурс бының менән генә тамамланмай, — ти телевидение студияһының баш мөхәррире Гүзәл Хәсәнова. — Эстафетаны республика райондары, ҡалалары ҡабул итә. Ҡайһы берәүҙәрҙең үҙҙәрендә «Райондың 100 исеме» конкурсын уҙғарырға ниәтләнеүе тураһында мәғлүмәт бар. Шунлыҡтан кандидаттары «Башҡортостандың 100 исеме» проектына инмәүенә төшөнкөлөккә бирелгән тамашасылар геройҙарының исемдәре онотолмаҫ, тип ышана ала».