Төбәктә Шәйехзада Бабичтың ижадына арналған бәйге ойошторола

ӨФӨ, 2017 йыл, 31 ғинуар. /«Башинформ» мәғлүмәт агентлығы, Ләйлә Аралбаева/. Башҡортостанда Шәйехзада Бабичтың ижадына һәм республиканың ойошторолоуына 100 йыл тулыуға арналған конкурсҡа ижади эштәр ҡабул итеү башлана. Бәйгелә 2-11 класс уҡыусылары ҡатнаша ала. Номинациялар: шиғриәт, проза (хикәйә, инша, повесть, миниатюра), публицистика (мәҡәлә, очерк, фельетон). Конкурсҡа башҡорт һәм рус телдәрендә яҙылған әҫәрҙәр ҡабул ителә. Темаһы ирекле, әммә Ш.Бабичтың тормошо һәм ижады, республиканың 100 йыллығы менән ауаздаш булырға тейеш.

Бәйге өс этапта үтә: I этап — ижади эштәрҙе ҡабул итеү (1-28 февраль); II этап — конкурс комиссияһының тәҡдим ителгән эштәрҙе баһалауы (1-15 март); III этап — финал, ҡатнашыусыларҙы һәм еңеүселәрҙе бүләкләү, финалсыларҙың үҙҙәре яҙған әҫәрҙәре менән сығыш яһауы (18 марттан да һуңға ҡалмайынса).

Эштәрҙе 1 мартҡа тиклем [email protected] адресына ебәрергә йәки баҫылған вариантты Дүртөйлө районы, Әсән ауылы, Н. Йоносов урамы, 20 адресына килтерергә кәрәк.

Конкурсты ойоштороусы булып Милли Әҙәби музей филиалы — Шәйехзада Бабич музейы сығыш яһай.