Мәскәү тәнҡитсеһе Алексей Бартошевич Башҡорт драма театрында «Антигона» ҡуйылышын баһаланы

ӨФӨ, 2017 йыл, 30 ғинуар. /«Башинформ» мәғлүмәт агентлығы, Ольга Мортазина/. Мәскәү тәнҡитсеһе Алексей Бартошевич Башҡорт академия драма театрында Жан Ануйҙың пьесаһы буйынса Ҡазан режиссеры Фәрит Бикчәнтәев ҡуйған «Антигона» спектаклен баһаланы. Ҡуйылыштан һуң театр белгесе ижади коллектив менән осрашты, спектаклгә анализ яһаны һәм уның тураһында үҙ фекерен белдерҙе:

«Был иҫ киткес заманса спектакль. «Антигонаның» тексы миңә бик яҡшы таныш, бер нисә тапҡыр был пьеса буйынса ҡуйылышты күрҙем. Актерҙарға, театрға, режиссерға ошо пьесаны һайлағандары өсөн афарин, тип әйтәм. Был спектакль, кешене, файҙа барлығына, йә юҡлығына ҡарамай, үҙ дәрәжәһен һаҡлап ҡалыу мөмкинлегенә эйә булыуына өйрәтә. Кешенең дәүләт, алла, ғаилә алдында бурысы барлыҡҡа килеүе ихтимал. Әммә Жан Ануйҙың геройы алдында үҙ-үҙе алдындағы бурыс иң мөһиме булып ҡала. Тик уны кешенән бер нисек тә алып булмай. Был бик заманса яңғырай», — тип «Башҡортостандың мәҙәни донъяһы» порталы Бартошевичтың һүҙҙәренән өҙөмтә килтерә.

Спектаклдә Антигонаның ролен – актриса Лилиә Ғәлина, Креонды театрҙың художество етәксеһе Олег Ханов башҡара. Театр эшмәкәрҙәре союзының съезында билдәле театр тарихсыһын саҡырыу идеяһы килеп тыуғанын һөйләй ул. Алексей Бартошевич кеүек бөйөк театр эшмәкәрҙәре менән осрашыуҙар актерҙарҙың аң даирәһен киңәйтә, театр процесын яҡшыраҡ аңларға һәм унда үҙенең урынын табырға ярҙам итә, тип билдәләне театр етәксеһе.