Башҡортостан артистары Ташкентта Үзбәкстан мәҙәни үҙәгенең 25 йыллығына бағышланған сарала сығыш яһай

ӨФӨ, 2017 йыл, 19 ғинуар. /«Башинформ» мәғлүмәт агентлығы, Ләйлә Аралбаева/. Ташкентта Үзбәкстан интернациональ мәҙәни үҙәгенең 25 йыллығын байрам итеүгә әҙерлек бара. Саралар 20-21 ғинуарҙа уҙа. Төп тантана — Үзбәкстандың сәнғәт оҫталары һәм «Үзбәкстан — дөйөм йортобоҙ» республика фестивалендә еңеүселәр ҡатнашлығындағы гала-концерт.

Бөтә донъя башҡорттары ҡоролтайы Башҡарма комитетының матбуғат хеҙмәтендә хәбәр итеүҙәренсә, концертты ошо фестивалдә лауреат исемен яулаған «Дуҫлыҡ» башҡорт фольклор ансамбле аса. Улар «Гөлнәзирә» йыр-бейеү композицияһы менән сығыш яһай. Ансамбль солистары шулай уҡ ҡумыҙҙа башҡорт халыҡ көйҙәрен уйнай. Сәхнәгә «Дуҫлыҡ» яңы костюмдарҙа сыға.

«Үзбәкстан — дөйөм йортобоҙ» фестивалендә «Иң яҡшы фольклор коллективы» тигән исем алғандан һуң, беҙгә республика ҡаҙнаһынан милли кейемдәр тегеү өсөн аҡса бүлделәр, — тине «Дуҫлыҡ» ансамбле етәксеһе, Үзбәкстандағы Башҡорт ҡоролтайы рәйесе урынбаҫары Рәйсә Баймырҙина. — Был — беҙҙең хеҙмәттәрҙе таныу ул, быға ҡыуанмау мөмкин түгел. Милләтебеҙҙе Ташкент сәхнәһендә иң яҡшыһы итеп күрһәтәсәкбеҙ».

Интернациональ мәҙәни үҙәктең 25 йыллығына арналған юбилей саралары барышында ҡулланма, һынлы сәнғәт әҫәрҙәре һәм төрлө халыҡтарҙың йолаларын, Үзбәкстандың милләт-ара татыулыҡ, дуҫлыҡ һәм берҙәмлеккә булышлыҡ итеү буйынса тәжрибәһен сағылдырған фотоһүрәттәр күргәҙмәһен ойоштороу ҙа ҡаралған. «Үзбәкстанда толерантлыҡ мәҙәниәте» документаль фильмы, «Үзбәкстан — тыныслыҡ һәм татыулыҡ иле» исемле китап, «Берҙәм ғаиләлә» журналының махсус һаны әҙерләнә. Үзбәкстандағы Башҡорт ҡоролтайы ҡарамағындағы башҡорт ойошмалары — «Ағиҙел» клубы, «Һандуғас» ансамбле ағзалары һәм башҡалар юғарыла атап үтелгән сараларҙа ҡатнаша, тип билдәләнеләр урындағы Ҡоролтайҙа.