Өфөлә Башҡортостандың атҡаҙанған рәссамы Урал Мөхәмәтшин яҡты донъянан китте

Өфө, 2017 йыл, 1 ғинуар. /«Башинформ» мәғлүмәт агентлығы, Ләйлә Аралбаева/. Республика сәнғәте ҙур юғалтыу кисерҙе. Өфөлә 64-се йәшендә Башҡортостандың атҡаҙанған рәссамы Урал Мөхәмәтшин яҡты донъянан бик иртә китеп барҙы.

Мәрхүм менән хушлашыу иртәгә, 2 ғинуарҙа, көндөҙгө сәғәт берҙә Сәскәле урамы, 2 адресы буйынса урынлашҡан мәйетханала уҙасаҡ. Ул Тимаш зыяратында ерләнәсәк.

Урал Ғүмәр улы Мөхәмәтшин Өфөлә тыуған, әммә Туймазы районының Ҡандра ауылын үҙенең икенсе төйәге итеп һанай, ул унда үҙенең ағаһы менән һәр йәйен өләсәһе менән олатаһында уҙғара. 1980 йылда Өфө дәүләт сәнғәт институтының һынлы сәнғәт бүлеген тамамлай. Рәссамдың эштәре Өфөлә М.В.Нестеров исемендәге Башҡорт дәүләт художество музейында, шәхси коллекцияларҙа һаҡлана. Ул иң ҡатмарлы — тарихи жанрҙы тергеҙеүселәрҙең береһе була. Уның эштәре араһында – «Крәҫтиәндәр һуғышы. Пугачев һәм Салауат», «Мифтахетдин Аҡмулла портреты», «Иҫке Ҡандрала әбейҙәр сыуағы» (2008), «Әсәй портреты» (2010), «Крәҫтиәндәр һуғышы» (2008), «Яңы ай», «Ҡасим Дәүләткильдеев портреты», «Атай портреты», 112-се Башҡорт кавалерия дивизияһына арналған «Аттар — фронтҡа» картиналары.

Урал Мөхәмәтшин 1975 йылдан алып республика, зона, төбәк, төбәк-ара, бөтә Рәсәй, бөтә союз һәм халыҡ-ара конкурстарҙа ҡатнаша. 2006 йылдан Башҡортостан Республикаһының атҡаҙанған рәссамы. 2014 йылда РФ Рәссамдар союзының «Рухилыҡ, йолалар, оҫталыҡ» исемле күргәҙмәлә Алтын миҙалға эйә була.