Башҡорт филармонияһы яңы йылға Classic-парад менән инә

Өфө, 2016 йыл, 29 декабрь. /«Башинформ» мәғлүмәт агентлығы, Ләйлә Аралбаева/. Хөсәйен Әхмәтов исемендәге Башҡорт дәүләт филармонияһы яңы йылға Classic-парад менән инә. 5 ғинуарҙа «Өфө органына 30 йыл!» проекты сиктәрендә Бәләкәй зал сәхнәһендә филармония дуҫтары, күренекле Өфө музыканттары – халыҡ-ара конкурс лауреаттары, пианинола уйнаусы Тимофей Владимиров, Данил Дауытов, кларнетта уйнаусы Руслан Вәлиев, скрипкасы Илшат Мөслимов, концертмейстерҙар Мария Вәлиева һәм БР атҡаҙанған артисы Индира Әсәҙуллина сығыш яһаясаҡ.

Программала – Каччини, Шопен, Чайковский, Прокофьев, Баццини, Годовский музыкаһы. Башлана киске сәғәт алтыла.