Блогерҙар боҙҙан арт-объект бысып Өфөгә һөйөүен белдерҙе

Өфө, 2016 йыл, 26 декабрь. /«Башинформ» мәғлүмәт агентлығы, Екатерина Чакина, Әлим Фәйезов/. Өфө блогерҙары Рәис Ғәбитов, Шамил Вәлиев, Павел Степанов һәм Совет районы хакимиәте башлығы Урал Килсенбаев боҙҙан «#ялюблюуфу» исемле арт-объект яһаны. Уларға рәссам Илшат Бүләков ярҙам итте.

Скульптура «Өфө-Арена» спорт комплексы эргәһендәге боҙ ҡаласығына бик килеште. Боҙ һындарҙың төп идеяһы – «спортсылар аллеяһы». Ул һарайҙар һәм батша лабиринттары булған әкиәт тематикаһына тоташа. Йөрәк формаһындағы яңы арт-объект ҡараңғыла ҡыҙыл төҫтә яҡтыртасаҡ. Бөгөн киске сәғәт алтыла ҡаласыҡ уттары ҡабыҙыласаҡ, ә боҙ һындар яҡтыртып торасаҡ. Теләгән һәр кеше Яңы йылдың яҡынлашыуын һәм мөғжизәлекте тоя аласаҡ. Ҡала халҡы боҙҙан яһалған скульптура композициялары янында фотоға төшә һәм «#ялюблюуфу #этоуфа» тигән флешмобта ҡатнаша ала.