Өфөлә Матбуғат балында 2016 йылдағы иң яҡшы журналистарҙың исемдәре иғлан ителде

ӨФӨ, 2016 йыл, 16 декабрь. /«Башинформ» мәғлүмәт агентлығы, Ләйлә Аралбаева/. Өфөлә Матбуғат балында уңышлы журналистарҙың исемдәре иғлан ителде. Сарала 2016 йылға йомғаҡ яһалды. Унда федераль, республика һәм район киң мәғлүмәт саралары, корпоратив баҫма вәкилдәре, министрлыҡ һәм ведомство, предприятие һәм компанияларҙың матбуғат хеҙмәте хеҙмәткәрҙәре ҡатнашты. Төрлө тармаҡтар буйынса лауреаттар билдәләнде, шулай уҡ «Йыл журналисы»ның исеме аталды. Еңеүсе — «Юлдаш» радиоһы хеҙмәткәре Зөһрә Арсаева.

«Иҡтисад һәм финанстар» номинацияһында — «Рәсәй гәзите»нән Ольга Горюнова, «Мәҙәниәт һәм сәнғәт» номинацияһында «Рампа. Башҡортостан мәҙәниәте» журналының баш мөхәррире Игорь Тонконогий наградаға лайыҡ булды. «Һаулыҡ һәм экология» номинацияһында — «Аргументы и Факты» гәзитенән Светлана Истомина, «Социаль яҡлау» номинацияһында «Республика Башкортостан» гәзитенән Галина Тряскина еңеүсе тип танылды. Башҡортостан юлдаш телеканалынан Рәмзиә Кәримова-Байбулатова «Мәғариф» номинацияһында еңеп сыҡты. «Спорт һәм сәләмәт тормош алып барыу» номинацияһында — «Туймазы хәбәрҙәре»нән Анфиса Аитова, «Сәнәғәт һәм инвестициялар» номинацияһында РБК — Өфө телеканалы иң яҡшыһы булды. «Сәйәсәт һәм йәмғиәт» номинацияһында — «Ҡыҙыл таң» гәзитенән Илдар Фазлетдинов, «Тыуған төйәк» номинацияһында «Көйөргәҙе» гәзитенән Нияра Кашапова еңде. «Башнефть» командаһы иң яҡшы матбуғат хеҙмәте тип билдәләнде. Социаль селтәрҙәрҙә иң яҡшы бит — «Йәшлек» гәзитенеке.

«Башинформ» агентлығы журналистары ике наградаға лайыҡ булды. Иҡтисад бүлеге хәбәрсеһе Галина Бахшиева энергетика темаһын яҡтыртҡаны өсөн Башҡортостандың энергия һатыу компанияһынан диплом һәм приз алды. «Йәмәғәт электрон гәзите»нең әҙәби мөхәррире Евгения Сюткинаны киң мәғлүмәт саралары һәм йәмәғәт экологик ойошмалары араһында бәйләнештәрҙе нығытыуға өлөш индергәне өсөн Рус география йәмғиәтенең төбәк бүлексәһе бүләкләне.