Башҡортостанда сәсәндәр әйтеше фольклорсы Әхмәт Сөләймәновҡа арнала

ӨФӨ, 2016 йыл, 14 декабрь. /«Башинформ» мәғлүмәт агентлығы, Ләйлә Аралбаева/. Башҡортостанда «Аҡмулла нәсихәттәре» республика фольклор байрамы уҙғарыла.

Байрам барышында билдәле ғалим, фольклорсы, йәмәғәт эшмәкәре Әхмәт Сөләймәновҡа арналған «Әхмәт әйтеше» бәйгеһе ойошторола. Унда Әбйәлил, Белорет, Благовар, Бүздәк, Бөрйән, Ғафури, Дәүләкән, Йылайыр, Иглин, Ҡырмыҫҡалы, Салауат райондарынан, Өфө, Учалы һәм Салауат ҡалаларынан профессиональ һәм үҙешмәкәр ҡобайыр әйтеүселәр, шағирҙар, ауыҙ-тел ижады оҫталары ҡатнаша.

16 декабрҙә фольклор байрамы Миәкә районында дауам итә. Ҡунаҡтар һәм ҡатнашыусылар мәғрифәтсе һәм шағирҙың тыуған ауылы Туҡһанбайға бара. Шул уҡ көндә теләгән һәр кем «Күҙ теймәһен ҡулыңа!», «Беләгеңә көс-ҡеүәт!» күргәҙмәләре менән таныша, биҙәү-ҡулланма сәнғәте буйынса оҫталыҡ дәрестәрендә ҡатнаша ала. Фольклор байрамы «Аҡмулла нәсихәттәре» концерты менән тамамлана, унда сәсән-импровизаторҙар һәм М.Аҡмулла исемендәге премия лауреаттары сығыш яһай.

Фестивалде ойоштороусылар — Башҡортостан Сәсәндәр үҙәге.

Конкурс 15 декабрҙә Республика халыҡ ижады үҙәгенең мәҙәниәт һарайында иртәнге сәғәт 10-да башлана.