Өфө сәнғәт институты Асыҡ ишектәр көнөнә саҡыра

ӨФӨ, 2016 йыл, 28 ноябрь. /«Башинформ» мәғлүмәт агентлығы, Ләйлә Аралбаева/. 16 декабрҙә Заһир Исмәғилев исемендәге Өфө дәүләт сәнғәт институтында Асыҡ ишектәр көнө уҙғарыла. Иртәнге сәғәт 10-дан көндөҙгө 4-кә тиклем республиканың төп ижади юғары уҡыу йортонда абитуриенттар һәм уларҙың ата-әсәләре өсөн белгеслек һәм йүнәлештәр буйынса консультациялар ойошторола.

Көндөҙгө сәғәт 12-лә Шаляпин залында студенттар ҡунаҡтарға концерт ҡуя. Уҡыу йортоноң икенсе корпусында театр факультеты Ғ.Ғиләжев исемендәге Уҡыу театрына саҡыра, унда ижади эштәр менән танышырға мөмкин.

Һорауҙар менән ҡабул итеү комиссияһына мөрәжәғәт итергә була. Адресы: Ленин урамы, 14, телефон: 276-19-36. Музыка факультеты: 273-45-91, башҡорт музыкаһы факультеты: 272-40-26, ситтән тороп уҡыу бүлеге: 272-27-60; икенсе корпустың адресы: Цюрупа урамы, 9, театр факультеты: 272-24-31, һынлы сәнғәт факультеты: 276-47-29. Тулыраҡ мәғлүмәт — вуздың сайтында.

Өфө дәүләт сәнғәт институтының дүрт факультетында (музыка, театр, һынлы сәнғәт һәм башҡорт музыкаһы) 20 һөнәр буйынса белгестәр әҙерләнә. Сәнғәт институтында буласаҡ музыканттар, дирижерҙар, артистар, хор етәкселәре, композиторҙар, йырсылар, актерҙар, режиссерҙар, рәссамдар, дизайнерҙар уҡый. Уны тамамлаусылар республика, Рәсәй, сит ил театрҙарында, музыка учреждениеларында, сәнғәт һәм мәҙәниәт уҡыу йорттарында, радиола һәм телевидениела эшләй. Көндөҙгө һәм ситтән тороп уҡыу бүлектәренә ҡабул итеү ойошторола, ҡайһы бер белгеслектәр өсөн әҙерлек төркөмдәре бар.