«Ҡурай байрамы» күрше төбәктәрҙе яулай

ӨФӨ, 2016 йыл, 23 ноябрь. /«Башинформ» мәғлүмәт агентлығы, Арина Рәхимҡолова/. «Ҡурай байрамы» Башҡортостандан ситкә сыға. Тәүгеләрҙән булып фестиваль Ырымбур өлкәһендә уҙғарыла. Сараны Башҡортостан Мәҙәниәт министрлығы, Республика халыҡ ижады үҙәге һәм Бөтә донъя башҡорттары ҡоролтайының Башҡарма комитеты ойоштора.

28 ноябрҙә М.Горький исемендәге Ырымбур драма театрында ҙур концерт уҙа. Сәхнәлә Башҡортостандың халыҡ артистары Азат Айытҡолов һәм Римма Амангилдина, Рәсәй Ҡурайсылар союзы рәйесе Артур Ғайсаров, халыҡ-ара конкурстар еңеүсеһе Марсель Ҡотоев, «Арғымаҡ» этно-рок төркөмө һәм Милли халыҡ уйын ҡоралдары оркестры сығыш яһай.

Байрам барышында Ырымбур ҡалаһының Н.Крупская исемендәге китапханаһында тарихтың һәм мәҙәниәттең мөһим мәсьәләләрен, урындарҙа башҡорт этносын артабан үҫтереү мөмкинлектәрен тикшереү өсөн тарихсылар, этнографтар, генеалогия өлкәһендәге белгестәр ҡатнашлығында түңәрәк өҫтәл үткәреү ҡаралған. Ошонда уҡ «Башҡортостан» киностудияһының фильмдары күрһәтелә. Тамашасылар «Бал әсеһе», «Күңел йыры», «Тере шишмә» кинотаҫмаларын һәм «Ай һәм Урал тауҙары нисек барлыҡҡа килгән» йәнһүрәтен ҡараясаҡ.

Ырымбур, Силәбе өлкәләрендә һәм Пермь крайында ҡурайҙа уйнау буйынса оҫталыҡ дәрестәре ойошторола.

6 декабрҙә фестивалде Пермь ҡалаһы, 8 декабрҙә — Магнитогорск, 9 декабрҙә — Силәбе, 10 декабрҙә Мейәс ҡабул итә. Ҡурай байрамы Ҡурған ерендә тамамлана.