Матбуғат балында республиканың иң яҡшы журналистары билдәләнә

ӨФӨ, 2016 йыл, 23 ноябрь. /«Башинформ» мәғлүмәт агентлығы, Ләйлә Аралбаева/. Өфөлә Матбуғат балында Башҡортостандың иң яҡшы журналистары билдәләнә. Йыл һайын ойошторолған был сара 15 декабрҙә «Версаль» ресторанында була. Унда федераль, республика һәм район киң мәғлүмәт саралары, корпоратив баҫмалар вәкилдәре, министрлыҡ һәм ведомство, предприятие һәм компанияларҙың матбуғат хеҙмәте хеҙмәткәрҙәре саҡырыла.

Профилле министрлыҡтар һәм ведомстволар «Иҡтисад һәм финанс», «Сәйәсәт һәм йәмғиәт», «Мәҙәниәт һәм сәнғәт», «Социаль яҡлау», «Мәғариф», «Спорт һәм сәләмәт тормош», «Һаулыҡ һәм экология», «Сәнәғәт һәм инвестициялар», «Атайсал» кеүек төп номинацияларҙа дәғүәселәрен тәҡдим итә. Эксперттар советы — «Предприятиеның иң яҡшы матбуғат хеҙмәте», «Министрлыҡ һәм ведомстволарҙың иң яҡшы матбуғат хеҙмәте», «Иң яҡшы корпоратив баҫма», «Социаль селтәрҙәрҙә иң яҡшы бит», республиканың киң мәғлүмәт саралары иһә үҙ хеҙмәткәрҙәре араһынан «Йыл журналисы» исеменә кандидаттар күрһәтә.

«Йыл журналисы» номинацияларында еңеүселәр, шулай уҡ «Социаль селтәрҙәрҙә иң яҡшы бит», «Предприятиеның иң яҡшы матбуғат хеҙмәте», «Министрлыҡ һәм ведомстволарҙың иң яҡшы матбуғат хеҙмәте», «Мәғлүмәттәр йәһәтенән иң асыҡ компания», «Иң яҡшы корпоратив баҫма» номинацияларында кандидаттар vote.imkufa.ru сайтында тауыш биреү юлы менән асыҡлана. Тауыш биреү 1 декабрҙән 8-нә тиклем ойошторола.

Онлайн-тауыш биреү барышында «Йыл журналисы» исеменә өс дәғүәсе билдәләнә. Еңеүсене эксперт советы һайлай.