Башҡортостан һәм Өфө яңылыҡтары
92.26
-0.33
99.71
-0.56
86.97
-0.03
-3 °C
Болотло
Бөтә яңылыҡтар
Мәҙәниәт
24 Октябрь 2016, 14:40

Республиканың 100 йыллығына «Өфө мираҫы» тип аталған мәҙәни-тарихи этнокомплекс барлыҡҡа килеүе ихтимал

ӨФӨ, 2016 йыл, 24 октябрь. /«Башинформ» мәғлүмәт агентлығы, Ләйлә Аралбаева/. Башҡортостандың 100 йыллығына «Өфө мираҫы» тип аталған мәҙәни-тарихи этнокомплекс барлыҡҡа килеүе ихтимал. Йәмәғәтселәр уны Октябрь революцияһы урамында һаҡланып ҡалған тарихи төҙөлөш базаһында төҙөргә тәҡдим итә. Улар бергәләп республика Башлығына мөрәжәғәт иткән һәм «Өфө мираҫы» этнокомплексын 100 өҫтөнлөклө инвестиция проекттары исемлегенә индереүҙәрен һорай. Мөрәжәғәткә ҡул ҡуйыусылар араһында танылған архитекторҙар, дәүләт экспертизаһы эксперттары, тарихсылар, тыуған яҡты өйрәнеүселәр, журналистар, рәссамдар бар.
«Өфө мираҫы» проектының нигеҙендә — өс туристик маршрут: беренсеһе Дуҫлыҡ монументы — Октябрь революцияһы урамы — Ҡунаҡһарай — Коммунистик урамы; икенсеһе: Пушкин урамы — Яңы күпер урамы — Ленин урамы — К. Маркс урамы — Гоголь урамы; өсөнсөһө: Салауат урамы — Софья аллеяһы (Туҡай һәм Рәсүлев урамдары) — Совет урамы — Гоголь урамы. Проект инициаторҙары Аксаков паркында Йәйге театрҙы тергеҙергә кәрәк тип иҫәпләй. Тюлькиндың йорт-музейында ХХ быуаттың икенсе яртыһындағы — XXI быуат башындағы башҡорт һынлы сәнғәт мәктәбенең музей-күргәҙмәләр залын асырға тәҡдим ителә.
«Өфө мираҫы» мәҙәни-тарихи этнокомплексы инфраструктураһына йәйәүлеләр зонаһын һәм велосипед юлдарын индереү күҙаллана. Тергеҙелгән биналарҙа музейҙар, милли ихаталар урынлаштырырға тәҡдим ителә. «Бында йыл дауамында байрамдар, фестивалдәр ойошторорға, ҡаланың үҙенсәлекле тарихи мөхите һәм бөйөк яҡташтарыбыҙ, шәхестәребеҙ йәшәгән, ижад иткән урындар менән ҡыҙыҡһынған сит ил делегацияларын һәм ҡунаҡтарын саҡырырға мөмкин. Улар — Рудольф Нуриев һәм Федор Шаляпин, яҙыусылар Сергей Аксаков, Сергей Довлатов, Андрей Платонов, рәссамдар Михаил Нестеров һәм Давид Бурлюк, башҡа фән, мәҙәниәт һәм сәнғәт эшмәкәрҙәре. Өфө туристар һәм ҡала халҡы өсөн тағы ла ҡыҙыҡлыраҡ һәм күркәмерәк булыр ине», — тип иҫәпләй проект авторҙары.
Проектты тормошҡа ашырыу барышында ошо объектты төҙөү өсөн профессиональ архитекторҙарҙы һәм реставраторҙарҙы, төҙөүселәрҙе, эшҡыуарҙарҙы, шулай уҡ ирекмәндәрҙе, юғары уҡыу йорттары студенттарын һәм уҡыусыларҙы йәлеп итеү күҙаллана.
Читайте нас: