Башҡортостандан яугир-йырсы Артур Хәсәнов имеш-мимештәргә яуап ҡайтарҙы

Өлөшләтә мобилизация барышында интернет йондоҙона әйләнгән яҡташыбыҙ, йырсы Артур Хәсәнов МХО зонаһында һәләк булыуы хаҡындағы имеш-мимештәргә яуап ҡайтарҙы. Артур үҙенең ижадын һөйөүселәрҙең борсолоуҙарын таратып, алғы һыҙыҡта ҡар бабай янында төшкән фотоһүрәте менән уртаҡлашты. 

«Мин имен-һау, зинһар, имеш-мимештәргә ышанмағыҙ», — тип яуап бирҙе Артур яҙылыусыларына.

Артур Хәсәнов өлөшләтә мобилизация ваҡытында Филүс Ҡаһиров репертуарынан «Кейек ҡаҙ юлдары» йырын башҡарыуы күптәрҙең иҫендә. Уның видеояҙмаһы тиҙ ваҡытта интернетҡа таралып, йырсыға көтөлмәгән популярлыҡ килтерҙе. Видеоға ҡарата күптәр йылы фекерҙәрен яҙҙы, яугирға именлек теләп доғалар ҡылды. Артурҙың йыр-моңға һәләтен Әнүәр Нурғәлиев, Рифат Зарипов, башҡорт һәм татар эстрадаһының башҡа йырсылары бик юғары баһаланы.

Бөгөн «Хәсән» позывнойлы яугир алғы һыҙыҡта Ватан алдында хәрби бурыс үтәй. Артур ижад итеүгә ваҡыт табырға ла өлгөрә, ул бер нисә йыр сығарҙы, отпускыһы мәлендә концерттарҙа, фестивалдәрҙә сығыш яһай.

Бынан алда Башҡортостандың халыҡ артисы Радик Динәхмәтов Башҡортостан полкы яугирҙәренең батырлығы тураһында һөйләне.